Detalles
4 persoas
4 horas
Fácil
A cochinita pibil é un guiso moi popular na cociña mexicana, podemos comela de moitos xeitos: en tacos, con arroz… Orixinalmente faise con carne de porco mariñada en zume de laranxa agre e cocíñase baixo a terra, lentamente baixo as brasas e entre follas de bananeira. Como é dificil atopar as naranxas agres e cociñar baixo a terra entre as brasas non é moi práctico, imos facer unha versión máis sinxela da receita tradicional. No caso das laranxas, imos empregar laranxas normais e mesturar o seu zume con zume de limón para conseguir o sabor acedo. Para cociñala imos facela ao forno, se temos unha cocotte ou pota de ferro fundido cociñarémolo dentro desta, se non, podemos facer sobres de papel de aluminio como se fose un papillote.
É importante a carne que escollemos, precisamos que teña graxa para evitar que fique seca. Recomendamosvos que empreguedes carne de porco pola agulla, é tenra e ten máis graxa que outras partes como o lombo, que quedaría demasiado seca.
A pasta de achiote, as tortiñas de millo e os chiles habaneros podemos encontralos facilmente en tendas ou frutarías de produtos latinos.
Print
Ingredientes
1 kg de carne de porco
(agulla ou cabeza de lombo)90 g de pasta de achiote
125 g de zume de laranxa
100 g de zume de limón
100 g de vinagre de viño branco
1/2 culler de comiño en pó
1/2 culler de ourego seco
1/2 culler de canela en pó
2 folla de loureiro
4 dentes de allo
- Para cociñalo:
1 culler de unto ou manteiga de porco
- Para o acompañamento:
tortiñas de millo pequenas
2 cebolas moradas
2 chiles habaneros
2 laranxas
3 limas
Pasos
- En primeiro lugar imos facer o mollo no que mariñaremos a carne. Para isto botamos no vaso do batedor a pasta de achiote, o zume de laranxa, o zume de limón, o vinagre branco, o comiño, a canela, os allos e un chisco de sal. Batemos todo ben até que quede homoxéneo. Reservamos.
- Cortamos a carne en anacos duns 3 centímetros sen retirar a graxa, xa que nos axudará a que non se seque no cociñado. Nun cunco de cristal ou cerámica botamos os anacos de carne e cubrimos co mollo que acabamos de facer, engadimos o ourego e as follas de loureiro e mesturamos todo ben. Cubrimos cun papel film e deixamos na neveira unhas 10 horas, idealmente dun día para o outro.
- Para o acompañamento, cortamos as duas cebola en tiras e picamos ben os chiles quitándolles as sementes. Importante facelo con cuidado de non tocar a cara xa que son moi moi picantes.
Exprimimos o zume das dúas laranxas e de 2 limas, e mesturamos nun cunco o zume coa cebola e os chiles picados. Deixamos na neveira tapado cun papel film durante 3 ou 4 horas para que maceren. - Unha vez mariñada a carne, imos cociñala no forno lentamente, idealmente dentro dunha cocotte ou pota de ferro fundido coa tapa posta para que non escape o vapor. Se non temos unha cocotte facemos sobres de papel de aluminio como se fose un papillote. Para isto cortamos un anaco de papel de aluminio duns 90 cm de longo e dobrámolo ao medio, marcando as dúas metades. Para pechar o envoltorio dobramos a outra metade sobre a primeira e nas beiras dos lados facemos 4 ou 5 dobreces pequenas sobre si mesmas para que non escape nin o líquido nin o vapor. Enchemos o sobre coa carne e o líquido, botamos a culler de manteiga de porco e pechamos a última abertura dobrandoa sobre si mesma como as outras beiras. Colocámolo nunha bandexa por se rompera a bolsiña non perder o mollo.
- Metemos no forno que previamente quentamos a 160 graos e deixamos unhas 3 horas, para que se cociñe ben a carne e se desfaga.
- Pasadas as 3 horas sacamos do forno con cuidado de non queimarnos e separamos a carne do mollo, que debía ter reducido bastante. Se vemos que ficou moi líquido podemos acabar de reducir nun cazo a lume medio-baixo. Retiramos as follas de loureiro.
- Con dous garfos desfiamos os anacos de carne, e unha vez desfiada mesturámola ben co mollo reducido.
- Quentamos as tortiñas de millo nunha tixola, tamén se pode facer na tostadora.
- Colocamos sobre cada tortiña un pouco de carne con mollo e cebola macerada escorrida. Podemos engadirlle aguacate en anacos tamén. Servimos cunha lima cortada en cuartos para expremer por enriba.
