Detalles
Racións
8 unidades
Tempo
30 minutos
Dificultade
Fácil
Moldes
Vasiños de chato
As natillas ou crema de ovo é unha das sobremesas máis populares, pero non adoitamos facela na casa. Esta é a receita que nos fai a nosa amiga Marisilvi sempre que pode. É unha receita sinxela, rápida e ben saborosa, unha vez que a probedes non volveredes mercalas nunca máis.
Print
Ingredientes
4 ovos
175 g de azucre
1 litro de leite
2 culleradas de maicena
8 galletas maría
1 rama de canela
1 limón
canela en pó
Pasos
- Lavamos e tiramos a monda do limón cun pelador con coidado de non sacar a parte branca para que non amargue.
- Apartamos un vaso do litro de leite e o resto botámolo nunha pota pequena xunto co azucre, a monda do limón e a rama de canela.
- Poñémolo a lume medio remexendo de cando en vez até que empece a ferver, retiramos do lume e deixamos infusionar durante 10 minutos. Unha vez infusionado quitamos as mondas do limón e a rama de canela.
- Ao leite que reservamos no vaso engadímoslle pouco a pouco a maicena e mesturamos ben antes de engadir máis para evitar que se formen bolos. Cando teñamos toda a maicena disolta no leite botámola nun cunco, engadímoslle os 4 ovos e batemos todo até que quede unha mestura homoxénea.
- A continuación botamos a mestura na pota co leite quente e poñemos a lume baixo, remexemos constantemente cun batedor de globo para evitar que se pegue até que espese.
- Cando vexamos que xa ten a consistencia desexada, retiramos do lume e servimos en 8 cuncos. Nós empregamos vasos de chato. Agardamos que arrefríe un pouco e colocamos as galletas enriba, a continuación botamoslles canela en pó ao gusto.
- Metémolas na neveira e servímolas frías.
