Lentellas con verduriñas

Detalles

Racións

2 persoas

Tempo

60 minutos

Ingredientes

  • 250 g de lentellas

  • 400 g de cabaza

  • 3 porros

  • 3 dentes de allo

  • 1 pemento vermello

  • 3 patacas

  • comiño en pó

  • pemento doce en pó

  • sal

  • aceite

Pasos

  • Podemos deixar a remollo a noite anterior as lentellas para que sexa máis rápido cociñalas.
  • Comezamos pelando a cabaza e cortamos en dadiños. Lavamos e cortamos en toros os porros e os pementos en anacos non moi pequenos.
  • Botamos un chisco de aceite nunha pota fonda e douramos a cabaza xunto cos porros e os pementos. Engadimos os dentes de allo pelados, cubrimos con abundante auga e botamos tamén as lentellas, lavadas e escorridas.
  • Botámoslle un chisco de sal, pemento doce en pó e comiño en pó ao gusto e mesturamos todo. Agardamos a que comece a ferver e deixamos a fogo medio durante uns 30 minutos máis ou menos, remexendo de vez en cando.
  • Un pouco antes de que pasen os 30 minutos pelamos as patacas, escachámolas cun coitelo e incorporámolas ás lentellas. Probamos o sal e engadimos un chisco máis se for necesario. Seguimos cociñando outros 15 minutos máis ou menos, até que as patacas e as lentellas estean listas.
  • Deixámolas repousar uns minutos e servimos ben quentiñas.